83. А пошлют которого недельщика имать татей и розбойников, и ему имати татей и розбойников без хитрости, а не наровити ему никому, а изымав ему татей и розбойников не отпустити, и от того посулов не имати. А понаровит которой недельщик татю или розбойнику по посулом, и его отпустит, и про то сыщется допряма, и на том недельщике исцов иск доправить, да его же бити кнутом, да вкинути в тюрму.

84. А которой губной целовалник розбойника, или татя отпустит, или животы розбойничьи, или татаныя покрадчи збежит, и того целовальника животы отдать в и(ы)сцов иск в выть, чего искал в полы иску, а чего животов его в полы исцова иску не дойдет, и тот досталной иск взяти на тех людех, кто того целовальника в губные целовальники выбирал. Да тех же людей, кто того целовальника выбирал, давати на поруки в том, что им того губнаго целовалника, которой подкрадчи побежит, сыскав, поставити. А как того губного целовалника те люди, кто его выбрал, сыщут, и того губного целовалника бити кнутьем, а бив кнутьем ис целовалников выкинути.

85. А будет по челобитью исца, или ответчика доведется про разбойное или татиное дело обыскати повалным обыском, и как повалным обыском сыскивати, и о том указ писан в судной статье выше сего.

86. А у которого недельщика будут за приставом тати, и тому недельщику татей без докладу на поруки не давати. А которой недельщик, не доложа боярина и без дьячья ведома татей даст на поруки, а сыщется про то допряма, и на том недельщике доправити исцов иск вдвое, да его же за то бити кнутом и вкинути в тюрму, до государева указу.

87. А будет кто у кого в дому сведает поличное, и похочет то поличное выняти, и ему на то поличное взяти ис приказу пристава, а приставу взяти с собою понятых, сторонних людей, добрых, кому мочно верити, и поличное выняти с теми людьми, куды он послан будет искати, и то поличное выняв, отвести в приказ с теми же людьми, при ком то поличное вымет. А будет в том дому, где то поличное будет никого не застанут, и то поличное по тому же отнести в приказ с понятыми, а в приказе про то поличное сыскивати и росправа чинити по указу, до чего доведется, а бес понятых приставу поличного не выимати. А будет кто в дому своем поличного искати и клети и иных хором отомкнути не даст, или поличное и татя у пристава, и у понятых отоймет, а сыщется про то допряма, и на том, кто так учинит, истцу доправити убытки, по сыску, все сполна.

88. А будет кто татя с поличным убьет в дому своем, и того убитого тот час объявит околным людем, и объявя, вести к записке в приказ. А будет кто за татем погонится с сторонними людьми и на дороге, или на поле, или в лесу тот тать изымати себя не даст, и учнет дратися, и того татя на погоне кто убьет до смерти, или ранит, и того убитого, или раненого татя с поличным, что он покрал, по тому же привесть в приказ с погонщики вместе. А будет кто татя изымав, и не водя в приказ, учнет пытать у себя в дому, и на нем татю доправить бесчестье и увечье, а в чем его пытал, и ему татьбы своей на том тате искати судом, а ис приказу того татя пытать не велеть. А будет поличное в дому чьем выняли, а жена и дети про те краденые животы ведали, и на них имати выть по указу. А будет бедны и заплатить нечем и их отдати исцу головою, покаместа отработаются, а на год им зачитати за работу, женскому полу по полутретья рубли.